2r 24

Yn imezço// y huel mellahuac yn intlacamecayo y yehuantin tlahtoque Reyes españa yhuan Emperador // Don Carlos quinto yhuan in tohueytlahtocauh Rey axcan ompa motlahtocatilia amo huel mitoz y macamo yntech moquixtia in cenca ahco tlacpac moyetzticate in tlaçotecpipiltin tlahtoque// yn itlahtocahuan yehuantin motenehua Godos y ye ontzonxihuitl ypan // yepohualli ypan caxtollomome xihuitl axcan y ye oncatqui in tlahtocacalli in tlahtocatlacamecayotl castillan in çâ niman ayc cana ocotonico y maca çan iuh mecatl yn tlahtocatlamecayotl (sic) ytech huitz in tettatzin quihualmaca ypiltzin ahnoço ychpoch ahnoço yteyccauh ahnoço ymach ahço centlamampa yteyccauh ynic amo campa oyah ynic amo can opoliuh yn in intlacamecayo y huel mellahuac intlahtocatlacamecayo y yehuantin tlahtoque Reyes Godos in oncan canin peuh ça ye oncan in catqui yn amo micuania yn intlahtocaTeocuitlatopil y macana oc ce tlacamecayotl ytech auh yehica ypampa y yehuatl tlahtocapilli infante catca Don Pelayo in tlahtocatico ça tepan y ye o yuh tlahpoliuh y ye o yuh pehualloque España tlaca çan no yehuatl oncan tetech quiça oncan tepiltzin yn iuh cequîtin quihtotiuh ca yteyccauh ^y in tlahtohuani Rey catca Don Rodrigo yn ipan mochiuh yaoyotl España ynic cacico Morostin anoço cacica quipoloca yehica ca oc ceppa oquicuique in christianosme auh yc atle yuhqui atle caci tlahtocayotl in ipan christianoyotl y manel no ypan in tlahtocayo Morostin yniqu iuhqui ynic cenca ye hueca auh yehica ypampa yn ipan mochi oc cequi tlahtocayotl omicuani omopahpatlac in cenca mahmahuiztic omihiquani ohuetzito yn tlahtocayotl ytech oc cececcan tetlacamecayotitech ahnoço yntech oc cequintin tlaca ahnoço çan otepehualtique oquinpeuhque oc centlamâtin tlaca